مزاد علني ... ألا أونا ..... ألا دوا ..... ألا تري
فتح المزاد .....
قرب .... قرب .... قرب ... فتح المزاد ..... إسمع وشوف وإتفرج .....
مزاد كبير ...مزاد خطير .... ألا أونا ..... ألا دوا ..... ألا تري ..... !!!!
كل حاجة للبيع ..... كل شيء مباح .... يعني البيع علي المكشوف .....
بدون مناقصات .... أو ممارسات .... والبنوك مفتوحة علي البحري لتأخذ منها ضمان ....
ونسيت أقولكم إن البنوك كمان ضمن المزاد .....
وللإشتراك في المزاد لتشتري حاجات لقطة ... لابد أن يتوفر فيك الشروط التالية :
(1) لابد أن يكون لك ضهر ...مش الظهر إللي فيه العمود الفقري والحاجات دي ... لا... الضهر اليومين دول .. مسئول كبير ... عضو لجنه من إياهم ... وزير مستوزر ....
(2) تكون مليونير كحد أدني والأولوية لأصحاب المليارات ....
(3) يكون ضميرك ميت لأن الحاجات التي ستباع في المزاد .... ستكون جزء من الأوطان ... أو حاجات مسروقة ... يعني بصراحة ... الشرفاء يمتنعون .....
وأسيبكم الآن في مزاد في القرن الواحد والعشرين .....
فتح المزاد ...... فتح المزاد ....فتح المزاد .....
قرب .... قرب .... قرب ... فتح المزاد ..... إسمع وشوف وإتفرج .....
عندنا النهاردة حاجات لقطة... عندنا شعوب.. وأراضي.. وأنهار.. وبحار ..وآثار... وحضارات ...وثقافات... وبنوك ...ومصانع... ومجموعة من المفاجآت ....
أول حاجة عندنا النهاردة :
شعب للبيع .....كله مميزات ... العدد فى الليمون .... مستأنس .... ممكن تبيع أعضاءه ... ممكن تسرطنه .... ممكن تعمل عليه تجارب ...ممكن تعتقله ... ممكن تضربه .... سهل السرقة ... وسهل في إنك تشغله سخرة أو بلقمته .... ممكن تشغل بناته خدامات .... أحلي حاجة فيه إنه شعب( هيفي ديوتي )...يعني خدمة شاقة ...تضربه علي قفاه يتحمل ... تذله يتحمل ... تطيرالنوم من عنيه يتحمل .... والمفاجأة الكبري ... تجوعه تعرف تحكمه .... يعني مش حيكلفك حاجة ..... في أي حتة ممكن تسكنه ... مقابر ماشي ... في الشارع ماشي .. علي الرصيف ما بيقولش لأ..ولا.... آه ... ويحب خنّاقه زي القطط بالظبط ... كل ما تطحن فيه يحبك و يغني لك ويقولك بالروح والدم أفديك ....العشرة ماتهونش عليه حتي لو مات نصه من الهم والفقر والمرض مش حيفكر يسيبك أبداً ... معدوم الطموحات والآمال ...
ثاني حاجة في المزاد اليوم :
حاجة بسيطة بس لقطة ..... قلم صحفي .... رقاص .... مكار ... كذاب ...مخادع .... ما يعرفش حروف الشين والراء والفاء .... علشان ممكن تتكون منهم كلمة شرف ...!!! مستعد يشتم ... يطعن ... يلعن ... بس للى يدفع أكثر ... بيشتغل ديجيتال ....مش مانيوال أول ما يشوف العضمة ... يهوهو ويكتب بسرعة 100 كلمة في الدقيقة .... ممكن تهاجم به العالم كله.. وأي حد ... شرفاء ... إصلاحيين .... رموز .... يخليلك الشيخ( زنديق) في مقالتين بس .... مشكلته الوحيدة إنه شره جداً للفلوس .. انت بس اديله.... يكتب لك مليون مقالة
ثالث حاجة عندنا في المزاد اليوم :
نهر.... مساحته بآلاف الكيلومترات .... يشرب منه ملايين ..... ومياهه عذبة زي السكر .... ما تفرقش مين يشتريه ... ومش لازم ننقله ممكن نسربه من تحت لتحت .... ويمكن إستخدام الطمي بتاعه في الزراعات وإستصلاح الأراضي ..... !!!
الحاجة الرابعة اليوم في المزاد قبل المفاجأة الكبري ....
بنوك كانت وطنية .... واتعثرت بفعل فاعل علشان تكون النهاردة لكم لوزة مقشرة .... فروع في كل محافظة وقرية ونجع ..... بسعر وهمي .... لا تقلق .... تسهيلات في الدفع ....
الحاجة الخامسة والمفاجأة الكبري .... ولأول مرة .....
هرمين .... تشتريهم نديلك الثالث هدية ..... أثريين جداً .... وممكن يعملوا دخل كويس جداً من السياحة .... وممكن لو الدفع فوري نديلك مع الهرم الهدية كام جمل لزوم الفسحة للسياح .... حاجه كده تفتخر بيها .. تشرح القلب .....
الحاجة السادسة في المزاد اليوم ....
آبار بترول وحقول غاز .... شعوبها محرومة من خيرها ..... محتاجين بيعها فوراً لتوفير مصروف أولاد العائلة الصغار ... لا نلتزم بأسعار البيع العالمية .. الأولوية لأولاد العم سام ....
الحاجة الأخيرة اليوم .... ونكمل في جلسة مزاد أخري ....
وطن للبيع ...... البيع مش بالمتر ..... شيله علي بعضها .... بأراضيه ...بمبانيه .... بشوارعه ... بكل حاجة فيه ... حكامه خلوا أهله زاهدين فيه .... لقطة ..... الدفع كاش بس في سويسرا ....
لو سمحتم هدوء .... إيه الزحمة دي ..... الصبريا جماعة ... عندنا حاجات كثيرة جداً بس أهم حاجة فلوسك ونفوذك يكونوا حاضرين .....
للراغبين في المشاركة في المزاد يمكنكم مراسلة مدونة متر الوطن بكام ... مع تحديد الحاجة المطلوبة ....
وطريقة الدفع ... وأهم حاجة الضامن أو السنيد ....
تقدم الطلبات بإسم الخبير والمثمن العالمي :عواد الندل ....
موضوع: مصر بتتباع في المزاد بس ماتقولوش لحد أصل الشعب مش واخد باله 
الأحد أبريل 20, 2008 3:59 am
